Dysgu

Trwy ddysgu’r iaith, sy’n cael ei siarad gan dros 700,000 o bobl ar draws y byd, rydych yn agor y drws i lawer o gyfleoedd a phrofiadau newydd. Bydd y rhai ohonoch sydd wedi dechrau dysgu Cymraeg yn barod yn ymwybodol o’r manteision o fedru deall ac ynganu’r iaith sydd o’ch cwmpas. Bydd gennych ddwywaith y dewis o adloniant, gyda theledu, radio a gwefannau ar gael ar gyfer siaradwyr yr iaith, ac, yn y pen draw, ystod eang o lenyddiaeth sy’n ymestyn dros ganrifoedd.

Mae pobl yn dysgu Cymraeg am lawer o resymau gwahanol: er mwyn gwaith, er mwyn y teulu, er mwyn teimlo’n rhan o’r gymuned, i enwi rhai. Ond beth bynnag ydy’ch rheswm chi dros ddysgu’r iaith, dylai’r broses fod yn un bleserus ac yn un sy’n rhoi boddhad.

Fel arfer, bydd y gwersi Cymraeg yn cael eu cynnal yn y Plas, cartref rheolwr y chwarel ers talwm ac yn y 'Sgubor. Mae’r ystafelloedd wedi eu dodrefnu â’r cyfarpar diweddaraf i’n galluogi i gynnig amrywiaeth o ddulliau dysgu, yn cynnwys dulliau traddodiadol. Os yw’r tywydd yn caniatáu, rydym yn ymdrechu i gynnal ychydig o weithgareddau y tu allan i’r dosbarth gan wneud y mwyaf o’r adnoddau naturiol sydd gennym o amgylch y safle

Bydd myfyrwyr sy’n mynychu ein cyrsiau preswyl Cymraeg yn aros yn hen fythynnod y chwarelwyr sydd bellach wedi eu huwchraddio i safon 4* (Llety Grŵp - Croeso Cymru). Bydd pob myfyriwr yn aros mewn ystafell breifat en-suite.  Mae ein hystafelloedd wedi’i dodrefnu'n gyfforddus ac mae carthen draddodiadol Gymreig ar bob gwely. Mae gennym ystafelloedd hygyrch ar gais.

Gall myfyrwyr ddefnyddio’r lolfa yn y Plas drwy gydol eu hamser yn y Nant. Mae’r lolfa yn ystafell gyfleus i astudio neu i ymlacio ynddi gyda’r nos. Bydd Caffi Meinir yn agored yn ystod eich amser yn y Nant a bydd y staff yno yn fwy na hapus i hybu eich defnydd o’r Gymraeg. Bydd cyfle i fyfyrwyr ymweld â’r arddangosfeydd treftadaeth a’r tŷ cyfnod tra maen nhw’n aros yn y Nant, a dysgu am hanes yr ardal unigryw hon.

Bydd adloniant wedi ei drefnu ar gyfer y nos Fawrth ac ymweliad ag atyniad lleol ar y prynhawn Mercher.  Rydym yn annog ein myfyrwyr i ymweld â Thafarn y Fic ym mhentref Llithfaen ar y nos Iau er mwyn cael profiad o dafarn Gymreig a chael cyfle i sgwrsio gyda'r trigolion lleol.

Rydym yn annog myfyrwyr i drafod eu hanghenion gyda thiwtor ymlaen llaw ac rydym yn anelu at gael pob myfyriwr ar y cwrs sydd fwyaf addas ar gyfer ei anghenion personol.

Os ydych chi’n ansicr o’ch lefel rydym yn eich annog i gysylltu â’r Tim Addysg i drafod.  Ni fydd tiwtor ar gael bob amser gan y byddant yn dysgu, ond bydd aelod o staff y Swyddfa yn cymryd eich manylion ac yn trefnu i’r tiwtor gysylltu â chi cyn gynted ag sy’n bosib.

Mae ein tiwtoriaid yn hapus bob amser i’ch helpu i ddewis y cwrs gorau ar gyfer eich anghenion chi.

addysg@nantgwrtheyrn.org

Er mwyn cofrestru ar gwrs Prif Ffrwd:

• Cliciwch ar y cwrs yr hoffech gofrestru arno.
• Bydd y cwrs yn agor ar wefan Dysgu Cymraeg.
• Os oes lle ar y cwrs byddwch yn gallu clicio ar y botwm gwyrdd 'Cofrestru' a dilyn y cyfarwyddiadau.
• Os yw'r cwrs yn llawn, bydd botwm llwyd 'Mynegi Diddordeb' yn ymddangos.  Drwy glicio ar y botwm hwn a nodi eich manylion byddwch yn mynd ar y rhestr aros ar gyfer y cwrs.  Os fydd rhywun yn canslo, byddwn yn cynnig y lle i'r rhestr aros ar delerau cyntaf i'r felin.
• Rydym yn eich annog i drefnu sgwrs gyda thiwtor cyn cofrestru os nad ydych yn sicr o'ch lefel.

Cynlluniau Eraill:

Er mwyn cofrestru ar gwrs 'Defnyddio' Cymraeg Gwaith, cwrs Codi Hyder, cwrs ar gyfer y Sector Iechyd neu gwrs ar gyfer y Gweithlu Addysg bydd rhaid i chi gysylltu â ni yn uniongyrchol i drefnu sgwrs dros y ffôn er mwyn gwirio bod lefel y cwrs yn addas i chi cyn eich bod yn gallu cofrestru.  Wedi i ni gadarnhau eich lefel byddwn yn rhannu dolen gofrestru gyda chi er mwyn i chi allu cofrestru ar lein.

NODER: Mae'n rhaid i’r Nant sicrhau bod lleiafswm o 4 dysgwr wedi cofrestru ar unrhyw gwrs er mwyn bwrw 'mlaen gyda'r cwrs a hynny er mwyn sicrhau y profiad gorau i bawb.

Os oes rhaid i Nant Gwrtheyrn ganslo cwrs am unrhyw reswm, ymdrechir i roi gwybod i’r dysgwr bythefnos cyn diwrnod cyntaf y cwrs ble mae hynny'n bosib. Dan yr amgylchiadau hyn bydd eich taliad yn cael ei ad-dalu neu mae modd i chi ddod ar gwrs arall o fewn 24 mis.