Pwy 'Di Pwy

Yn ystod ei yrfa amrywiol mae Huw Jones wedi bod yn ganwr pop ac yn gyflwynydd a chynhyrchydd teledu. Roedd yn un o sylfaenwyr cwmnïau Sain, Barcud a Theledu’r Tir Glas cyn dod yn Brif Weithredwr S4C rhwng 1994 a 2005. Bu’n aelod o fyrddau cyrff megis Bwrdd yr Iaith Gymraeg, Cyfle, yr RSPB a Bwrdd Cyflogaeth a Sgiliau Cymru ac yn Gadeirydd S4C rhwng 2011 a 2019. Ar hyn o bryd, mae hefyd yn Gadeirydd Portmeirion Cyf. Mae’n byw yn Llandwrog, Gwynedd. Cyhoeddwyd ei hunangofiant “Dwi Isio Bod yn…” gan Y Lolfa yn 2020. Mae wedi bod yn aelod o Fwrdd Ymddiriedolaeth Nant Gwrtheyrn ers 2007. Penodwyd ef yn Gadeirydd ym mis Gorffennaf 2018.

Mae gan Garffild brofiad helaeth mewn nifer o feysydd gan gynnwys Newyddiaduraeth, Cyfathrebu, Marchnata, Hyfforddi a Rheoli Prosiectau Strategol. Bu’n newyddiadurwr, hyfforddwr a rheolwr gyda BBC Cymru am 25 o flynyddoedd cyn sefydlu ei gwmni ei hun ym meysydd ymgynghori strategol a hyfforddi. Yna fe ymunodd â S4C yn 2009 yn gyntaf fel Cyfarwyddwr Cyfathrebu a Marchnata ac yna yn Gyfarwyddwr Prosiectau ac Adleoli. Garffild oedd Cyfarwyddwr y prosiect i adleoli pencadlys S4C i ganolfan greadigol yr Egin yng Nghaerfyrddin.

Yn 2017 ar ol gadael S4C fe ymunodd â chwmni ymgynghorol ei wraig, Sian Eirian Cyf – cwmni sy’n arbenigo ym meysydd y Gymraeg, y Celfyddydau, y Cyfryngau a Digwyddiadau. Yn 2017 hefyd cafodd ei ethol yn Gynghorydd ar Gyngor Bwrdeistref Sirol Conwy ac yn aelod o’r Cabinet am ddwy flynedd – yn gyfrifol am Addysg, Sgiliau a Chyflogadwyedd a’r Gymraeg. Bu hefyd yn Gadeirydd Fforwm Strategol y Gymraeg y Sir, ac yn Arweinydd Bwrdd Sgiliau’r Awdurdod.

Fe roddodd y gorau i fod yn Gynghorydd Sir ym mis Mai 2022 er mwyn canolbwyntio ar waith y cwmni.

Mae Gwyn yn wreiddiol o ardal Penuwch, Ceredigion ac yn byw yn Aberaeron ers1987.

Cyn ymddeol yn 2015 roedd Gwyn yn Gyfarwyddwr Strategol Adnoddau Corfforaethol Cyngor Sir Ceredigion gyda chyfrifoldeb am holl ochr ariannol y Sir yn ogystal ag am Dechnoleg Gwybodaeth a Chyfathrebu, a’r gwasanaethau cyfreithiol, adnoddau dynol; democrataidd; llyfrgelloedd; amgueddfa; archifdy; cofrestru a chanolfannau croeso.

Mae ganddo brofiad maith yn y maes ariannol a gwasanaeth cyhoeddus gan iddo cyn hynny fod yn Gyfarwyddwr Cyllid Cyngor Ceredigion ac yn Brif Archwilydd Mewnol. Bu’n gweithredu fel Trysorydd Mygedol Cyngor Llyfrau Cymru, ac mae ganddo gymwysterau ACCA a FCCA.

Bu’n aelod o fwrdd Theatr Genedlaethol Cymru ac mae’n Ymddiriedolwr i Ymddiriedolaeth James Pantyfedwen a nifer fawr o gymdeithasau lleol yng Ngheredigion.

Yn gyn-chwaraewr rygbi, mae ei ddiddordebau bellach yn fwy hamddennol, gan gynnwys bowlio, seiclo, cerdded, y theatr, opera a gweithio ar ei randir.

Etholwyd yn 2023.

Yn wreiddiol o Alltyblaca, Ceredigion mae Menna wedi ymgartrefu yn Llanwnda, Caernarfon  gyda’i theulu Idris, Mabon a Caradog. Bu’n gweithio am gyfnod byr i Dr Carl Clowes, yn Awdurdod Iechyd Gwynedd, ac yna i Dafydd Wigley, A.S. yn Swyddfa Plaid Cymru, Caernarfon, a Chymdeithas Tai Eryri fel Swyddog Datblygu Prosiectau, ac yn Brif Weithredwraig  Antur Waunfawr am dros chwarter canrif. Mae newydd gychwyn swydd Rheolwr Datblygu Ynys Enlli. Mae’n aelod o fwrdd Menter a Busnes, Urdd Gobaith Cymru ac  Arloesi Gwynedd Wledig. Mae’n argyhoeddiedig bod mentrau cymdeithasol yn allweddol i ddarparu atebion creadigol a blaengar i ddiwallu gwasanaethau a datblygu busnesau lleol. Mae Menna wedi bod yn aelod o Fwrdd Ymddiriedolaeth Nant Gwrtheyrn ers mis Hydref 2017. Penodwyd hi yn Is Gadeirydd rhwng  2018 a 2022.

Mae Ann yn wyneb cyfarwydd ar dudalennau cylchgronnau a rhaglenni teledu. Mae’n gynllunydd mewnol llwyddiannus, ar gyfer busnes a chartref, ers 1992. Tyfodd i fyny yn Llanllwni, Sir Gaerfyrddin, gan symud i Gaerdydd yn 1983. Ers hynny, mae wedi treulio cyfnodau ym Mhentyrch ac Aberdyfi ac yn fwy diweddar yn Aberaeron gan adnewyddu eiddo’n gyson, gyda’i gwr Gareth a’i phlant Gwilym, Seren a Brennig, i’w chanlyn. Yn ogystal â chynllunio mewnol, yn y blynyddoedd diweddar mae wedi creu Llety Bodfor (2001-2015), gwesty 5 seren yn Aberdyfi, yn ogystal â SELD, siop a storfa arlein yn Aberaeron. Mae hefyd yn cynllunio a gwerthu ystod o gynnyrch Cymreig ar gyfer y cartref.

Bu’n aelod gweithgar o Meithrin ac o bwyllgorau’r Eisteddfod a’r Urdd ac yn llywodraethwr ysgol  ac mae hi nawr yn falch o fod yn aelod o Fwrdd Ymddiriedolaeth Nant Gwrtheyrn.

Cafodd Jo ei magu yn Waunfawr ger Caernarfon, gan ddysgu Cymraeg yn yr Ysgol Feithrin ac yn yr ysgol, cyn symud i Gaerdydd i astudio a gweithio ym myd y cyfryngau. Bu hefyd yn gwneud gwaith marchnata i’r cwmni theatr blaengar Brith Gof ac yn datblygu ei phrosiectau creadigol ei hun ym maes tecstiliau.

Symudodd i Lundin lle bu’n gweithio i Sky Sports a Sky Movies, gan arwain timau hyrwyddo creadigol ac, fel cyfarwyddwr aml-gamera, yn teithio i America i weithio ar yr Oscars ac yn rheoli prosiect ffasiwn amlgyfryngol yn Nhokyo gyda’r grŵp cydweithredol Acid Casuals.

Mae hi nawr yn byw gyda’i theulu yng Nghaerdydd. Ar ôl gweithio i adran Hysbysebu Granada o fewn S4C Rhyngwladol yn cynhyrchu hysbysebion dwyieithog, cafodd swydd fel cynhyrchydd gyda Wordley Creative lle mae hi nawr yn Gyfarwyddwr Creadigol ac yn berchennog, yn creu hysbysebion teledu ac yn cynghori cwmnïau Prydeinig a rhyngwladol ar sut i safleoli eu hunain fel brandiau. Mae’n aelod o Fwrdd yr Ymddiriedolaeth ers 2019.

Yn wreiddiol o Kidderminster, symudodd Martyn i Lŷn yn 2009 ar ôl dod i’r ardal ar wyliau trwy gydol ei blentyndod. Mae o bellach yn byw yn Llannor ger Pwllheli efo’i deulu. Dechreuodd o ddysgu Cymraeg cyn symud i Gymru ac ar ôl llwyddo i basio arholiad lefel-A Cymraeg ail iaith a chwblhau cymhwyster TBAR, dechreuodd o weithio fel tiwtor Cymraeg yn 2012. Enillodd wobr Dysgwr y Flwyddyn yn 2013 yn Eisteddfod Genedlaethol Dinbych. Mae o wrth ei fodd yn dysgu dosbarthiadau Cymraeg ar bob lefel ac yn helpu pobl eraill i ddod yn siaradwyr Cymraeg.

Cafodd Rhiannon ei magu nes yn 9 oed, ym mhentref Llanaelhaearn, tafliad carreg o’r Nant, cyn symud i Roscefnhir ym Môn.

Celf a dylunio yw’r maes mae’n arbenigo ynddo. Wedi derbyn gradd mewn Tecstiliau (gwau a gwehyddu) o Brifysgol John Moores yn Lerpwl, symudodd i Gaerdydd a setlo yn Grangetown gyda’i theulu.

Cychwynnodd ei gyrfa ar ôl graddio yn gweithio i ‘Gad-y-Gwlân’ fel dylunydd a gwneuthurwr. Bu wedyn yn gweithio i Gwmni Theatr Brith Gôf yn yr adran wisgoedd ac yna fel Rheolwr Llwyfan.

Tua diwedd y 90’au a thrwy gydol y 2000’au, bu’n gweithio gyda Chwmni Rheoli Ankst gyda amrywiaeth o fandiau o Gymru a thu hwnt, gan roi’r cyfle i drafaelio fel rhan o’r tîm rheoli i Japan ag Ewrop a gweithio’n agos gyda phartneriaid yn y maes led-led y byd.

Mae bellach yn ymarferwr llawrydd ac wedi bod yn gweithio am gyfnod fel Cyfarwyddwr Celf i gwmni cynhyrchu yng Nghaerdydd.

Yn bresennol, mae’n gweithio’n bennaf fel dylunydd gyda chwmni dylunio mewnol sy’n ei galluogi i fwynhau cyfleon i weithio gyda phersonel o bob agwedd o waith dylunio mewnol, o’r penseiri i’r rheolwyr prosiectau, i’r gweithwyr ar y safle yn ogystal â chyflenwyr o Gymru a phob cornel o Ewrop.

Hanesydd pensaernïol sy'n byw yn Llanbedr Dyffryn Clwyd yw Greg Stevenson (50). Dysgodd Greg Gymraeg trwy'r system Wlpan ddwys yn Llanbedr Pont Steffan, lle bu'n astudio ac yn y pen draw yn darlithio yn yr Adran Archaeoleg. Mae’n enedigol o Loegr, i deulu oedd yn hannu o Fae Colwyn a Bethesda. Er nad yw’n meddwl ei fod yn gwbl rugl (byddai’r rhan fwyaf o bobl yn anghytuno), aeth ymlaen i ysgrifennu a chyd-gyflwyno nifer o gyfresi Cymraeg ar S4C yn y blynyddoedd cynnar, megis Y Tŷ Cymreig a'r Dref Gymreig. O ddydd i ddydd mae’n rhedeg asiantaeth fythynnod fechan (Under the Thatch) ac mae bob amser yn adeiladu neu’n adnewyddu prosiect neu ddau rywle yng Nghymru. Mae wedi gweithio ar dros gant o brosiectau adeiladu, ac yn awdur / cyd-awdur llyfrau fel ‘Cartrefi Cymreig’ (gyda Gwenda Griffiths), Cartrefi Cefn Gwlad Cymru (gyda Richard Suggett) yn ogystal ag eraill ar gartrefi’r 1930au, tai parod, bythynnod Gwyddelig a.y.b.

Bu’n gwirfoddoli fel Ynad Heddwch (Ceredigion) a chyfnod byr ar fwrdd Cadw. Pan nad yw ar safle adeiladu mae'n debyg o fod allan gyda'i ddau fachgen (Mici a Tasman) sy'n mynd i Ysgol Penbarras yn Rhuthun. Ymhlith ei hobïau mae casglu celf Cymreig ar ôl y rhyfel a cherrig gemau lled werthfawr. Penodwyd yn 2024

.